სამხრეთკორეელი ჰანგ მიოკუს ისტორია ერთ-ერთ ყველაზე გახმაურებულ შემთხვევად იქცა ესთეტიკური ქირურგიის ისტორიაში. ქალი, რომელიც ახალგაზრდობაში მოდელად და მომღერლად მუშაობდა, საკუთარი გარეგნობის გაუმჯობესების სურვილმა მძიმე ფიზიკურ და ფსიქოლოგიურ მდგომარეობამდე მიიყვანა.
.
მრავალი კოსმეტიკური ჩარევის შემდეგ მან სახეზე სხვადასხვა ნივთიერების დამოუკიდებლად შეყვანა დაიწყო, მათ შორის – ჩვეულებრივი საკვები ზეთისაც. შედეგი იმდენად მძიმე აღმოჩნდა, რომ მისმა სახემ ადამინური იერი დაკარგა.
ჰანგ მიოკუ სამხრეთ კორეაში ცხოვრობდა და ახალგაზრდობაში სამოდელო საქმიანობასა და სიმღერას მისდევდა. მისი ცხოვრების შესახებ გავრცელებული ცნობების თანახმად, პირველი პლასტიკური ოპერაცია 28 წლის ასაკში გაიკეთა.
თავდაპირველად მას უფრო გლუვი და ახალგაზრდული კანის მიღება სურდა. თუმცა პირველი ჩარევა უკანასკნელი არ აღმოჩნდა. მიოკუ სულ უფრო ხშირად მიმართავდა ესთეტიკურ პროცედურებს და დროთა განმავლობაში გარეგნობის შეცვლის სურვილი მის ცხოვრებაში ცენტრალურ ადგილს იკავებდა.
მოგვიანებით ქალი იაპონიაში გადავიდა, სადაც კოსმეტიკური პროცედურები გააგრძელა. ჩარევების დიდი ნაწილი სახეს ეხებოდა. მიუხედავად იმისა, რომ განმეორებითი პროცედურების შედეგად მისი სახე თანდათან იცვლებოდა და მოცულობაში იზრდებოდა, მიოკუ კვლავ ცდილობდა სასურველი გარეგნობის მიღწევას. ზოგიერთი ექიმი შემდგომი პროცედურების ჩატარებაზე უარს ამბობდა, რადგან მისი მდგომარეობა უკვე სერიოზულ შეშფოთებას იწვევდა.
სპეციალისტებმა მას ფსიქოლოგიური დახმარების მიღებაც ურჩიეს. მიოკუმ მკურნალობა დაიწყო, თუმცა მისი გაგრძელება ფინანსური სირთულეების გამო ვერ შეძლო.
სამხრეთ კორეაში დაბრუნების შემდეგ ქალის გარეგნობა იმდენად შეცვლილი იყო, რომ, იმდროინდელი მედიის ცნობით, ოჯახის წევრებსაც კი გაუჭირდათ მისი ამოცნობა. მიუხედავად ამისა, მიოკუ სახის შეცვლის მცდელობებს არ წყვეტდა.
მიოკუს ისტორიის ყველაზე მძიმე ეტაპი მაშინ დაიწყო, როდესაც მან საინექციო ნივთიერებების დამოუკიდებლად გამოყენება გადაწყვიტა.
2008 წელს ABC News წერდა, რომ მიოკუმ კორეულ მედიას უამბო ექიმის შესახებ, რომელმაც მას სილიკონი და შპრიცი მისცა, რათა ინიექციები სახლში დამოუკიდებლად გაეკეთებინა. როდესაც სილიკონის მარაგი ამოეწურა, ქალმა მის ნაცვლად ჩვეულებრივი საკვები ზეთის გამოყენება დაიწყო.
ეს უკიდურესად სახიფათო გადაწყვეტილება აღმოჩნდა. ორგანიზმის ქსოვილებში შეყვანილი ზეთი ჩვეულებრივი კოსმეტიკური შემავსებლის მსგავსად არ მოქმედებს. მას შეუძლია გამოიწვიოს ხანგრძლივი ანთებითი რეაქცია, ქსოვილების დაზიანება, კვანძების წარმოქმნა და მძიმე დეფორმაცია.
მიოკუს სახე და კისერი მნიშვნელოვნად გადიდდა. განსაკუთრებით შეიცვალა ლოყებისა და ქვედა ყბის მიდამოები. მისი გარეგნობა იმდენად განსხვავდებოდა ადრინდელისგან, რომ ქალი საზოგადოებაში დაცინვის ობიექტიც გახდა.
მისი ისტორია კორეულმა ტელევიზიამ გააშუქა. საზოგადოების ნაწილმა ქალის მიმართ თანაგრძნობა გამოხატა და მისი მკურნალობის დასაფინანსებლად თანხის შეგროვება დაიწყო. დახმარების შედეგად მიოკუმ მკურნალობა დაიწყო. პირველი ოპერაციის დროს ექიმებმა 860 გრამი უცხო ნივთიერება ამოიღეს. მოგვიანებით კიდევ რამდენიმე ოპერაცია ჩატარდა.
მკურნალობის შედეგად სახის მოცულობა მნიშვნელოვნად შემცირდა, თუმცა თავდაპირველი გარეგნობის სრულად აღდგენა შეუძლებელი აღმოჩნდა.
მიოკუ ფსიქიატრიულ მკურნალობასაც გადიოდა. ტელეკომპანიის ცნობით, მას თანდათან შეუმცირდა გარეგნობის შეცვლისადმი მტკივნეული სწრაფვა და გაუჩნდა იმედი, რომ საზოგადოებრივ ცხოვრებას დაუბრუნდებოდა.
მშობლები.ჯი
