სამართალი და კრიმინალი

სმიტების ოჯახის მკვლელობის საქმეში შავი ფერის პისტოლეტი და ხელთათმანი გამოჩნდა

​სმიტების ოჯახის მკვლელობაში ბრალდებულის ადვოკატი დავით გირგვლიანი ხადას ხეობაში მომხდარი მკვლელობის ვერსიაზე საუბრობს. ადვოკატი დავით გირგვლიანი საქმეში ახლა ჩაერთო, მანამდე მალხაზ კობაურის უფლებებს სხვა ადვოკატები იცავდნენ. როგორც ადვოკატმა განაცხადა, კობაური საუბრობს ორ უცნობ ადამიანზე, რომელბმაც სმიტების ოჯახის წევრები დახოცეს.

„მალხაზ კობაური მოყვა, რა მოხდა სინამდვილეში, რისიც მე მჯერა და თუ ჩვენ ამ საქმის ვერსიას გავიზიარებთ, ამ შემთხვევაში მალხაზ კობაური არა დამნაშავე, არამედ არის ამ დანაშაულის პირდაპირი მოწმე. კობაური ახსენებს ორ უცნობ ადამიანს, საქმეში ჩნდება შავი ფერის ავტომობილი, რომლითაც ორი უცნობი პიროვნება მივიდა ხადას ხეობაში, რომლებმაც მოკლეს სმიტების ოჯახი. მან განაცხადა, რომ ესენი არიან უცხოელები, ქართველებს არ გავდნენ, მეტყველებდნენ ქართულად, თუმცა საუბრობდნენ ისე, თითქოს ჯერ აზრებს ალაგებდნენ და მერე საუბრობდნენ. როგორც კობაური აცხადებს, ისინი დაახლოებით ორ მეტრამდე სიმაღლის იყვნენ, ჩრდილოკავკასიელებს გავდნენ და აქცენტიც უფრო ლეკური ჰქონდათ“, – განაცხადა ადვოკატმა.

მისივე თქმით, კობაური იხსენებს, რომ შავი ავტომობილი სმიტების ავტომობილის გვერდით გაჩერდა და მათი დანახვის შემდეგ მაიკლ სმიტი აღელვდა.

„კობაური აცხადებს, რომ შესაძლებელია, რომ სმიტების ოჯახის წევრები ამ მამაკაცებს იცნობდნენ. საქმის ინტერესებიდან გამომდინარე, ყველა დეტალზე ვერ ვისაუბრებ, თუმცა ვიტყვი, რომ მისი ჩვენება იყო თანმიმდევრული და ლოგიკური. ჩემი დაცვის ქვეშ მყოფის განმარტებით, ერთ-ერთმა მათგანმა მას თოფი წაართვა, მეორე პიროვნებას კი პისტოლეტი ჰქონდა შავი ფერის და შავი ფერის ხელთათმანი ეკეთა ხელზე. ვისი იარაღიდან მოხდა გასროლა, საქმის ინტერესებიდან გამომდინარე, ამაზე ჯერ ვერ ვისაუბრებ”, – აცხადებს ადვოკატი.

მისივე თქმით, კობაურმა ჩვენება ზეწოლის ქვეშ მისცა.

„როდესაც კობაური მოუყვა გამომძიებელს ყველაფერს, არავინ დაუჯერა, სთხოვდნენ, რომ ეღიარებინა დანაშული, იმყოფებოდა ფსიქიკური ზეწოლის ქვეშ და მოუწია ამ წნეხის პირობებში აღიარებითი ჩვენების მიცემა. მალხაზ კობაური ამ ორი ადამიანის ტყვე იყო. ეს ორი პიროვნება მას ოჯახის ამოწყვეტით დაემუქრნენ. ამიტომ სდუმდა ის დღეები, ეშინოდა. მას აღენიშნება მცირედი დაზიანება, ამ მცირედ დაზიანებაზეც ექსკლუზიურად თქვენ გეტყვით, რომ ეს არის ნიკაპზე. პოლიციელებს მისთვის არ მიუყენებიათ დაზიანება, ეს დაზიანება მიაყენა ერთ-ერთმა პიროვნებამ იმ ორიდან, რომელიც მას ცალკე აკავებდა და არ მისცა საშუალება, რომ კობაური დახმარებოდა სმიტებისოჯახს, როდესაც მეორე პირი მაიკლ სმიტს სასიკვდილოდ იმეტებდა“, – განაცხადა ადვოკატმა.

ხადას ხეობაში მკვლელობაში ბრალდებულ მალხაზ კობაურს მცხეთის რაიონულმა სასამართლომ გუშინ პატიმრობა შეუფარდა. პროცესზე ბრალდებულმა განაცხადა, რომ ხადას ხეობაში ამერიკისა და საქართველოს ორმაგი მოქალაქეები, რაიან და ლორა სმიტები, ასევე მათი ოთხი წლის შვილი მას არ მოუკლავს, ისინი მოკლა ორმა „უცხოურმა მამაკაცმა“, რომლებიც მას დაემუქრნენ. მოგვიანებით ბრალდებულის ადვოკატმა განაცხადა, რომ ხადას ხეობაში მკვლელობაში ბრალდებულის წარმოთქმული სიტყვა არასწორად იქნა აღქმული, ის გულისხმობდა ორ უცხო პირს და არა უცხოელს.

Related Articles

Leave a Reply

Your email address will not be published. Required fields are marked *

Back to top button
Close