ქეთი ძარღუაშვილი ახმეტაში დაიბადა და გაიზარდა. 25 წლის ასაკში დაამთავრა ილიას სახელმწიფო უნივერსიტეტი ტურიზმის განხრით. ამჟამად კი ბორტგამცილებელია. თავის პროფესიაზე ის ამბები.ჯი-სთან ყვება:
.
-„ემირატების” ბორტგამცილებელი ვარ. სიმართლე რომ ვთქვა, წამოსვლაზე ბევრი არ მიფიქრია, მსოფლიოს ერთ-ერთი საუკეთესო ავიაკომპანიის ბორტგამცილებელი ვარ და ამ შესაძლებლობას ხელიდან არ გავუშვებდი. როგორც კი გავიგე ღია კარის დღეზე, რამდენიმე დღეში უკვე დუბაიში გადმოვედი საცხოვრებლად. და მოკლედ რომ გიამბოთ ღია კარის დღის შესახებ, ის მიმდინარეობს ერთი დღის განმავლობაში და თუ ყველა ეტაპს გადალახავ, დაგირეკავენ და ყველანაირი ხარჯის დაფარვით, წაგიყვანენ, გასწავლიან და შემდეგ უკვე იწყებ ფრენას.
– ადამიანები ხშირად ვერ იაზრებენ ამ პროფესიის სირთულეს და შრომატევადობას, როგორი წარმოგედგინათ თავიდან თქვენი პროფესია და როგორი აღმოჩნდა რეალურად?
– თავიდან მხოლოდ კარგ მხარეს ვხედავდი, ვიდრე რეალობა არ ვნახე. თვეში 4-5-6 ქვეყანა, მოგზაურობა, ახალი ადამიანები, სხვადასხვა კულტურის გაცნობა, ჩემი ოცნება იყო, ეს სამსახური კი ზუსტად ამას მპირდებოდა. თუმცა მარტივი არაფერია და ამასთან ერთად, დიდი შრომაც გვიწევს. მთავარი გამოწვევა ალბათ ღამის ფრენები და უძილო ღამეებია, ასევე უკულტურო ადამიანები… მუშაობისას უამრავი განსხვავებული კულტურის ადამიანს ხვდები, რომლებსაც შეიძლება ვერ გაუგო, თუმცა როგორც კი უცხო ქვეყანაში ჩავდივარ, ყველაფერი მავიწყდება და ერთი სული მაქვს ხოლმე ვნახო ყველაფერი, რასაც მოვასწრებ. ასევე გვაქვს უდიდესი პასუხისმგებლობა, ჩვენ ვართ პასუხისმგებლები უსაფრთხოებაზე, მართალია ავიაცია ერთ-ერთი უსაფრთხო გადაადგილების საშუალებაა, თუმცა მზად უნდა იყო ყველაფრისთვის, ამიტომაც ფრენის დაწყებამდე საკმაოდ ინტენსიურ მომზადებას გავდივართ.
წელიწადნახევარში ვნახე 35 ქვეყანა. აქედან ყველაზე გრძელი გზა იყო დუბაიდან ახალ ზელანდიამდე ფრენა, რომელიც პირდაპირ სრულდება და 17 საათს გრძელდება.
– ფრენისას არაერთი სახიფათო მომენტი შეიძლება შეიქმნას, შეგიძლიათ გვიამბოთ ამის შესახებ? როგორ უმკლავდებით შიშს და მსგავს მომენტებს და რა არის მნიშვნელოვანი, რომ მგზავრებში პანიკა არ დაიწყოს?
– ფრენის შიში არასოდეს მქონია. ავიაცია ისე არის განვითარებული, ტურბულენტობა თვითმფინავს ვერ ჩამოაგდებს, ჩვენთან უამრავი წლის გამოცდილებაა საჭირო, რომ პილოტი გახდე, ამიტომ თუ ღვედი შეკრული გაქვს, არაფერია საშიში. მცირეოდენი განათლება ავიაციის შესახებ, ჩემი აზრით, შიშის მოხსნაშიც დაგეხმარებათ. თუმცა ბორტზე უამრავი ადამიანია, რომლებსაც ეს პრობლემა აწუხებთ, ვეუბნები ხოლმე, საშიში რომ იყოს, აქ ხომ არ ვიმუშავებდი-მეთქი?! ასევე დიდი გამოწვევაა სამედიცინო შემთხვევები. პირველადი დახმარების აღმოჩენის ტრენინგები გავლილი გვაქვს, თუმცა ჩემთვის ყველაზე სახიფათო მომენტებად მაინც ბორტზე ვინმეს ცუდად გახდომაა.
