სკანდალი! არჩევნების გაყალბების პროცესი დაწყებულია… _ რა ხდება სიღნაღის საარჩევნო უბნებში (გაშიფრული სია)

,,არჩევნები, არჩევნებამდე ყალბდება” _ ეს ცნობილი ფრაზა სიმართლეს მოკლებული არ არის.  თუ 2020 წლის არჩევნების წინასაარჩევნო მდგომარეობასა და ჩვენს ხელთ არსებულ ფაქტებს გადავხედავთ, სახელისუფლებო სტრუქტურებში გაყალბების პროცესი უკვე დაწყებულია. 1 ოქტომბერს, სიღნაღში, ნაციონალურმა მოძრაობამ, საოლქო საარჩევნო კომისიის შენობის წინ აქცია გამართა და კომისიის ხელმძღვანელებს პასუხი მოსთხოვა იმ მდგომარეობისთვის, რაც ამ ოლქის უბნების კომისიებში ხდება.

euronews.ge სიღნაღის საკრებულოს წევრს ნაციონალური მოძრაობიდან, გიორგი ბაბაკიშვილს დაუკავშირდა.

გიორგი ბაბაკიშვილი:

_ სანამ საუბნო კომისიების პირველი სხდომა ჩატარდებოდა, ჩვენ ჩაგვივარდა ხელში იმ პირთა სია, რომელთაც უპირებდნენ სიღნაღის ოლქის ოცდათხუთმეტ უბანზე საუბნო საარჩევნო კომისიის თავმჯდომარეებად, მოადგილეებად და მდივნებად დანიშვნას. იქ ისეთი გვარები აღმოვაჩინეთ, რომ სასწრაფოდ მივწერეთ საოლქო კომისიას და ვთხოვეთ, მოეხდინა რეაგირება, რათა ეს ადამიანები არ აერჩიათ აღნიშნულ თანამდებობებზე.

  _ რა გვარები ეწერა ამ სიაში?

_ თითქმის ყველა საუბნო კომისიაშია ჩასმული ჰყავთ მიკერძოებული  ხალხი, მაგრამ მე რამდენიმე ფაქტს გეტყვით. ქვემო მაღაროს 26-ე უბანის კომისიის თავმჯდომარედ დანიშნეს ქალბატონი, რომელიც გახლავთ  სიღნაღის საკრებულოში, ოცნების მაჟორიტარი დეპუტატის დედა. ფაქტია, იგი ვერ იქნება ნეიტრალური და ოცნების ინტერესებს გაატარებს.

სიღნაღის #1 უბნის თავმჯდომარე, ნანა ივანიძე, ა.ა.ი. პ.-ის თანამშრომელია. მისი მოადგილე, გიორგი შარმიაშვილი, გამგეობის თანამშრომლის მამაა. ამავე უბნის მდივანი, ნელი ფოლადაშვილი- ა.ა.ი.პ-ის თანამშრომელი გახლავთ.

სიღნაღის #2 უბანის თავმჯდომარე ვანო აბრამიშვილი არის გამგეობის თანამშრომელი, ამავე უბნის მდივანი ლაურა ღვინიაშვილი კი  ა.ა.ი.პ.-ის თანამშრომელია.

ანაგის #4 უბნის თავმჯდომარე ნინო საგინაშვილი ოცნების აქტივისტია, მოადგილე მანანა ილაშვილი- სკოლის პედაგოგი.

ვაქირის #5 უბნის თავმჯდომარე ლია ნანობაშვილი საჯარო სკოლის ბუღალტერია, მდივანი ჟუჟუნა შავერდოშვილიც იმავე სკოლის პედაგოგად მუშაობს.

(გიორგი ბაბაკიშვილმა გადმოგვცა სიღნაღის ოლქის საუბნო კომისიების ხელმძღვანელების გაშიფრული სია, რომელსაც სტატიის ბოლოს იხილავთ- რედ-ნ.ვ.).

ერისიმედის #16-ე საარჩევნო უბანზე, კომისიის 12 წევრიდან სხდომაზე მხოლოდ 6 წევრი მივიდა. აქედან 1 ნაციონალური მოძრაობის დანიშნული იყო. კანონი გვავალდებულებს – კომისიის შემადგენლობა შეკრებილად რომ ჩაითვალოს და უფლება ჰქონდეს, აირჩიოს თავმჯდომარე, მოადგილე და მდივანი, 7 წევრი მაინც უნდა ესწრებოდეს. ეს სხდომა ჩაიშალა. ისიც ვერ უზრუნველყო საოლქო საარჩევნო კომისიამ, რომ ოლქის მიერ შერჩეული 6 წევრი მიეყვანა უბანზე.

სრული ქაოსი და განუკითხაობაა სიღნაღის ოლქში და უბნებზე. საუბნო საარჩევნო კომისიის შემადგენლობები შერჩეულია მხოლოდ და მხოლოდ პარტიული ინტერესით, რაც უკვე მიგვანიშნებს, რომ მმართველი პარტია არჩევნების გასაყალბებლად ემზადება.

სიღნაღში, არჩევნების გაყალბების პროცესების დაწყებას ეძღვნებოდა ჩვენი აქცია. გვინდოდა, რომ საოლქო კომისიის თავმჯდომარე და მისი მოადგილე გამოსულიყვნენ, შეგვხვედროდნენ და მათთვის პირდაპირ გვეთქვა სათქმელი, მაგრამ ესეც არ ისურვეს. ამ აქციით გავაფრთხილეთ საოლქო კომისია, რომ სიღნაღში, ოპოზიცია, არცერთ ხმას არ გააყალბებინებთ.

euronews.ge გთავაზობთ სკანდალურ სიას, რომელშიც გაშიფრულია, საუბნო კომისიების ხელმძღვანელი პირების ინტერესები.