ჯანდაცვა

ექიმმა 22 წლის გოგოს ტყუილად ,,სიკვდილის დიაგნოზი” დაუსვა _ რა ხდება სამედიცინო დაწესებულებებში

დაავადებათა კონტროლისა და საზოგადოებრივი ჯანმრთელობის ეროვნული ცენტრის მონაცემების მიხედვით, 1 წლის განმავლობაში გორის სამედიცინო ცენტრ “გორმედში” 378 პაციენტი გარდაიცვალა.

გარდაცვალების მიზეზებიდან, ყველაზე ხშირი სუნთქვის მწვავე უკმარისობაა. ამ მიზეზით, 2019 წელს “გორმედის” 254 პაციენტი გარდაიცვალა. 12 პაციენტი გარდაიცვალა თავის ტვინის ინფარქტით, განვითარებული ცერებრული არტერიების დაუზუსტებელი ოკლუზიისა ან სტენოზის გამო. გარდაცვალების სხვა მიზეზებს შორის არის ინსულტი, რომელიც არ არის დაზუსტებული, როგორც სისხლჩაქცევა ან ინფარქტი – 2 პაციენტი; პნევმონია დაუზუსტებელი – 6 პაციენტი; ნაწლავის გაუვალობით – 3 პაციენტი; ასთმური სტატუსი (სტატუს ასტჰმატიცუს) – 1 პაციენტი; თავის ტვინის შერყევით -1, ბარძაყის ყელის მოტეხილობით – 1 პაციენტი. დანარჩენ მიზეზებს შორის ძირითადად არის სხვადასხვა ლოკალიზაციის სიმსივნეები. ეს გახლავთ ერთი სამედიცინო დაწესებულების საქმიანობის ოფიციალური მონაცემები. საზოგადოების წარმომადგენლები კი აცხადებენ, რომ იგივე მდგომარეობაა მთელი ქვეყნის მასშტაბით არსებულ ჯანდაცვის ობიექტებში.

აი, რა მოუთხრო euronews.ge -ს ჟურნალისტმა რუსუდან ადვაძემ:

   _ გორის ჰოსპიტალში უარესია სიტუაციაა. ,,უნიკალურ” დიაგნოზებს სვამენ, არარსებულსა და არგაგონილს! ჩემი ოჯახის წევრმა გოგონამ , გორის ჰოსპიტალში გადაიღო არტერიების დოპლერი, რადგან თავის ტკივილი აწუხებდა. საავადმყოფოდან დამირეკა შეშინებულმა, რაღაც პათოლოგიას ხედავს ექიმი და გთხოვ, დაელაპარაკეო. დაველაპარაკე ვინმე მაია კაპეტივაძეს, რომელმაც მითხრა, მგონი, მალფორმაციაა, ანუ თავში პათოლოგიური სისხლძარღვიო. ეს ანევრიზმაზე უარესია. ვუთხარი, შარშან თავის სისხლძარღვები გვაქვს  კომპიუტერით გამოკვლეული და ხომ გამოჩნდებოდა-მეთქი? კი, გამოჩნდებოდა, მაგრამ შეიძლება ვერ დაინახესო. კომპიუტერული კვლევის პასუხიც გადავუგზავნე, მაგრამ  დასკვნაში მაინც ჩაწერა- მალფორმაცია.
 მეორე დღეს თბილისში ჩამოვედით და კიდევ ერთხელ ჩავიტარეთ კომპიუტერული კვლევა, მაგრამ სულ ტყუილად, არანაირი პათოლოგია არ იყო. წარმოგიდგენიათ, ამ პერიოდში რა გავიარეთ? ფინანსური ხარჯი იქეთ იყოს, ლამის გული გამისკდა და მოვკვდი. ერთი ბოდიშიც კი არ მოიხადა ამის გამო ექიმმა, რომელმაც ტყუილი დიაგნოზი დაგვიწერა და სტრესში ჩაგვაგდო. 22 წლის გოგოს, ფაქტიურად,  უეჭველი სიკვდილი ,,უწინასწარმეტყველა”, ტყუილად და ეს არის წარმატებული ჯანდაცვა?
 თბილისის რეფერალურ საავადმყოფოშიც არ არის ჯანსაღი მდგომარეობა. ჩემი ძმა გახდა ავად. ამბობდა, თავი მაქვს დამძიმებული და ცუდად ვარო. წავიყვანეთ რეფერალურში. გამოვიდა ვინმე ეკა კუპატაძე და გვითხრა, არაფერია, ნევროზი აქვსო და 32 ლარი გადაგვახდევინა. ასეთი დიაგნოზით გაუშვეს სახლში ჩემი ძმა, რომელიც კვლავ გაიძახოდა, მიშველეთ, ცუდად ვარო. შაბათ კვირას სულ იწვა, ვერ ინძრეოდა. ორშაბათს სასწრაფო გამოვიძახეთ. სასწრაფოს ექიმებმა რეფერალურში გადაყვანა შესთავაზეს, მაგრამ არ გაყვა, იქ არ ვიყავი, რა აზრი აქვსო? ჩვენ წავიყვანეთ და კომპიუტერული ტომოგრაფია ჩავუტარეთ, საიდანაც ანგიოლოგთან გაგვიშვეს. აღმოჩნდა, რომ საძილე არტერიაში განვითარებული იყო თრომბი. ეს კი  იწვევს ინსულტს, მაგრამ თუ მიუსწარი, ოპერაცია კეთდება. სანამ ჩამოვყალიბდით რომელ სამედიცინო დაწესებულებაში მიგვეყვანა, თრომბმა გამოიწვია ჩაკეტვა, და ინსულტი, მაგრამ გადავრჩით და ჩემი ძმა არ დაინვალიდდა. ექიმებმა გვითხრეს, ასეთი რამ 99%-ში სიკვდილს გამოიწვევდა, სასწაული მოხდაო. ანუ ექიმებმა გაგვწირედ და ღმერთმა გვიხსნა. 
   ამის მერე მივედი რეფერალური საავადმყოფოს  დირექტორ ქეთევან შარანგიასთან და მომხდარზე საყვედური ვუთხარი. იმის ნაცვლად, რომ ბოდიში მოეხადა, მიკივლა, სადაც გინდა იქ იჩივლეო. აი, ასეთი ჯანდაცვა გვაქვს და ცხადია, მსხვერპლიც შესაბამისი იქნება.

Related Articles

Back to top button
Close