ქართველი დიზაინერის ინტრიგა
მიხეილ ბაჩუკიშვილი: „უკვე დრო იყო, მამაკაცის საქორწინო ხაზი შემექმნა“
მიხეილ ბაჩუკიშვილი ამერიკაში მცხოვრები ერთადერთი ქართველი დიზაინერია, რომელიც აშშ-ში სადედოფლო კაბების კოლექციებს ქმნის. ამჯერად მის მიერ შექმნილ მამაკაცის ხაზს დიდი გამოხმაურება მოჰყვა, რადგან განსაკუთრებული სითამამით გამოირჩევა. ამბები.ჯი დიზაინერს თავის საქმიანობაზე ესაუბრა:
-აქტიურად ვარ პროცესში ჩართული, თავით გადაშვებული, უკან დასახევი გზა დიდი ხანია, მოჭრილი მაქვს. აქედან გამომდინარე, ყოველი დღე, წუთი, წამი ახალი გამოწვევა, ახლის სწავლაა. აქ ოცნებები ნამდვილად ხდება და იმედი მაქვს, რომ შემდეგ ინტერვიუზე უფრო მეტს ვისაუბრებ ოცნებების ახდენაზე.
-საქართველოდან თუ გქონიათ დაკვეთა?
– საქართველოდან დაკვეთა არ მქონია, მაგრამ ქართველი პატარძლები გვყოლია. განსაკუთრებულად ამ ბოლო დროს იყო ბევრი. წარსულში მყავდა პატარძალი, რომელიც აქ ცხოვრობს. საქორწინო კაბა მე შემიკვეთა და ქორწილი საქართველოში გადაიხადა. ძალიან საინტერესო იქნება, თუ ვინმე საქართველოდან დისტანციურად დაკვეთის სურვილს გამოთქვამს.
– ძალიან თამამია თქვენი ამჟამინდელი ნამუშევრები, ფოტოსესიები… როგორი იყო გამოხმაურება?
.
– დიდი ხანი ვფიქრობდი, მამაკაცის საქორწინო ხაზი შემექმნა, რადგან მოდის სფეროში მამაკაცები მაინც დაჩაგრულებში ვართ. მთავარი იყო, ეს არ უნდა ყოფილიყო იმ ნიშის დარღვევა, რაც ქალების მიმართულებით მქონდა. კავშირი არ უნდა დაკარგულიყო. იმ ეტაპამდე მივედი, უკვე დრო იყო, მამაკაცის საქორწინო ხაზი შემექმნა. თუმცა ეს არ უნდა ყოფილიყო ჩვეულებრივი მამაკაცის სამოსი. ნამდვილად არ არის ჩემი ნამუშევარი მამაკაცის ხაზი ყველასთვის, მასისთვის… შეიძლება ეს კარგად არ ჟღერდეს, მაგრამ მართლაც ასეა. ეს ხაზი იმ ადამიანებისთვის არის შექმნილი, რომლებიც განსხვავებულს, სხვანაირ ესთეტიკას ეძებენ.
.
ნებისმიერ ადამიანს, რომელსაც ამბიცია არ აქვს, რომ განსხვავებულად ეცვას, არჩევანი დიდია. ბიუჯეტურიდან დაწყებული, მაღალი მოდის სახლის სამოსით დამთავრებული. ამიტომაც თუ გავაკეთებდი, ეს უნდა ყოფილიყო განსხვავებული და განსაკუთრებული! უფრო მეტი სითამამით, თუმცა აუცილებლად ესთეტიკურობით გამორჩეული. მინდა ვთქვა, რომ ჩემი მოლოდინი გამართლდა…
ამბები.ჯი
