All for Joomla All for Webmasters

ეკონომიკა

მთავარი ეკონომიკა

ეროვნული ვალუტა გაუფასურებას აგრძელებს _ ოფიციალური გაცვლითი კურსი

ეროვნული ვალუტა გაუფასურებას კვლავაც აგრძელებს – ოფიციალური გაცვლითი კურსი დღეს კიდევ 2 პუნქტით გაუფასურდა.

დღის ბოლოს ეროვნულმა ბანკმა ლარის ოფიციალური კურსი დოლართან მიმართებით 2.65-ით განსაზღვრა. გუშინ კი კურსი 2.63 ლარი იყო.

კომერციულ ბანკებში 1 აშშ დოლარის ღირებულება 2.69 ლარს აღწევს.

ლარი ევროსთან მიმართებით 0.0274 ლარით გაუფასურდა და ხვალ მისი ყიდვა 3.0882 ლარად იქნება შესაძლებელი.

ეროვნული ვალუტა ბოლო სამი კვირაა, არასტაბილური გახდა. მკვეთრად გაუფასურება ლარმა არჩევნების შემდეგ დაიწყო.

როგორი იქნება ქუთაისის განახლებული აეროპორტი?

2017 წლის პირველი ათი თვის მონაცემებით, ქუთაისის აეროპორტით 360 ათასამდე მგზავრმა ისარგებლა. 

2012 წლიდან მოყოლებული, ეს დინამიკა აღმავალი ტენდენციით იზრდება. სწორედ ამიტომ, ქუთაისის აეროპორტში ცვლილებები იგეგმება.

წამლები კიდევ უფრო მეტად გაძვირდა _ საგანგაშო სტატისტიკა

Medical supplies, pills and capsules

წამლები კიდევ უფრო მეტად გაძვირდა. ოფიციალური ინფორმაციით, წლის პირველ ნახევარში მედიკამენტების ფასი 7.2%-ით გაიზარდა. შარშანდელთან შედარებით კი, ზრდა 10%-ზე მეტია.

მოსახლეობა ამბობს, რომ აფთიაქებში მედიკამენტების ფასების საუკეთესო საზომი მათთვის საკუთარი ჯიბე და ჯანმრთელობაა.

ჯანდაცვის სფეროს სპეციალისტები თვლიან, რომ თვიდან თვემდე და წლიდან წლამდე წამლებზე მზარდი ფასების ერთ-ერთი მიზეზი გაუფასურებული ეროვნული ვალუტაა, თუმცა არა მთავარი და არა ერთადერთი.

ექსპერტები ამბობენ, რომ წამალს ქართულ ფარმაცევტულ ბაზარზე არსებული უკონტროლო ვითარება და ოლიგოპოლია აძვირებს.

ოპოზიციის ნაწილი ხელისუფლებას მსხვილი ფარმაცევტული კომპანიების ლობირებაში ადანაშაულებს, რომლებიც მოგებას პაციენტის ფინანსების ხარჯზე ზრდიან.

ჯანდაცვის სფეროს სპეციალისტები თვლიან, რომ ვითარების გამოსწორება შესაძლებელია, თუმცა, ამას ხელისუფლების პოლიტიკური ნება სჭირდება.

მედიკამენტების ფასებით უკმაყოფილო მოქალაქეების ისევე, როგორც ექსპერტების შენიშვნებისა და რეკომენდაციების საპასუხოდ, შესაბამის სახელმწიფო უწყებაში განმარტებებს არ აკეთებენ.

ჯანდაცვის სამინისტროში აცხადებენ, რომ ფარმაცევტული ბაზარი ფასს თავად არეგულირებს, რაშიც მთავრობა არ ერევა.

პროდუქტებზე ფასები გაზრდილია _ საქსტატის საგანგაშო სტატისტიკა

პროდუქტებზე ფასების ზრდა ქვეყანაში ოფიციალურად დასტურდება. ინფორმაციას სტატისტიკის ეროვნული სამსახური ავრცელებს. „საქსტატის“ მონაცემების მიხედვით ირკვევა, რომ ინფლაციის მაჩვენებელი მნიშვნელოვნად გაზრდილია, რამაც, თითქმის, ყველა სახის პროდუქტზე ფასების ზრდა გამოიწვია.

„ფასები, დაახლოებით, 28%-ით გაიზარდა ბოსტნეულსა და ბაღჩეულზე, დაახლოებით, 14%-ით ხილის ჯგუფზე და, დაახლოებით, 9%-ით ხორცპროდუქტებზე. ეს სამი კატეგორია გახლავთ მნიშვნელოვანი სურსათისა და უალკოჰოლო სასმელების ჯგუფში ფასების მატებისა. მეორე არის ტრანსპორტის ჯგუფი, რომელშიც ფასების დაახლოებით 15%-იანი ზრდა გვაქვს. მესამე ჯგუფია ალკოჰოლური სასმელები და თამბაქო, ჯგუფში ფასების 17%-იანი ზრდა გვაქვს, ჯანდაცვის ჯგუფში ფასები დაახლოებით, 5.8%-ით გაიზარდა, ფასები გაზრდილია გარკვეული კატეგორიის მედიკამენტებზე, ასევე სამედიცინო აპარატურაზეც,“- განაცხადა ’’საქსტატის’’ აღმასრულებელი დირექტორის მოადგილემ, გოგიტა თოდრაძემ.

სტატისტიკის ეროვნული სამსახურმა ოქტომბრის თვის მონაცემები გამოაქვეყნა. ექსპერტების პროგნოზით, პროდუქტებზე ფასები მომდევნო თვეებში კიდევ უფრო მოიმატებს.

„არ არის რთული იმის წინასწარმეტყველება, რომ ნოემბერ-დეკემბერში ინფლაციის მაჩვენებელი კიევ უფრო ზევით წავა,“- განაცხადა ეკონომისტმა, ლაშა გოცირიძე.

სპეციალისტების თქმით, პროდუქტებზე ფასების ზრდის მიზეზი მთავრობის არასწორ ეკონომიკურ პოლიტიკაა, მათ შორის აქციზზე ფასის გაზრდა.

„ვალუტის კურსის ცვალებადობა თუ გაგრძელდა გარკვეული პერიოდის განმავლობაში, ეს აუცილებლად ასახვას ჰპოვებს ფასებში ღეს და არა მომავალში,“- განაცხადა ეკონომისტმა, ირაკლი ყიფიანმა.

ყვარელსა და სურამში ტურისტებს ახალი სასტუმროები მოემსახურება

ეკონომიკის სამინისტროს განცხადებით, უახლოეს მომავალში ყვარელსა და სურამში ტურისტებს ახალი სასტუმროები უმასპინძლებს.

“ბოლო დროს საქართველოში დაფიქსირებულმა ტურისტული ნაკადების საგრძნობმა მატებამ  კიდევ უფრო მოთხოვნადი გახადა ქვეყანაში შესაბამისი ტურისტული ინფრასტრუქტურის განვითარება. სწორედ ამ მიზნით, პროექტ „50 ქონება შენი სასტუმროსთვის“ ფარგლებში საქართველოს ეკონომიკისა და მდგრადი განვითარების სამინისტროს სსიპ „სახელმწიფო ქონების ეროვნულმა სააგენტომ“ ინვესტორებს სურამსა და ყვარელში არსებული სახელმწიფო ქონება შესთავაზა”,-ნათქვამია სამინისტროს ინფორმაციაში.

სამინისტროს ცნობით, ელექტრონული აუქციონების მიმართ დაინტერესება საკმაოდ მაღალი აღმოჩნდა   და ვაჭრობის შედეგად გამოვლენილმა გამარჯვებულებმა სასტუმროს მშენებლობის ვალდებულება აიღეს.

“პროექტის ფარგლებში მიღებული შემოსავალი სულ უფრო იზრდება. დღეის მდგომარეობით, გაყიდულია 26 927 501 ლარის უძრავი ქონება, ხოლო სასტუმროების ასაშენებლად განსახორციელებელი ინვესტიციის მოცულობა არანაკლებ 58 200 000 ლარს შეადგენს”,-ახცადებენ საქართველოს ეკონომიკის სამინისტროში.

 

ბაქო-თბილისი-ყარსი _ პირველი რეისი შესრულებულია

ბაქო-თბილისი-ყარსის მაგისტრალით მოძრავი პირველი სატვირთო მატარებელი უკვე თურქეთშია. სატვირთო შემადგენლობამ ქართული მონაკვეთი, მათ შორის ახალქალაქის სადგური გაიარა, საქართველო-თურქეთის საზღვარი გადაკვეთა და ყარსის სადგურში ჩავიდა. ყაზახეთიდან წამოსული ხორბლის დანიშნულება თურქეთის ქალაქ მერსინის პორტია.

ბაქო-თბილისი-ყარსის მაგისტრალი ოფიციალურად 30 ოქტომბერს გაიხსნა. თუმცა, სრულყოფილად რკინიგზა მუშაობას 2018 წელს დაიწყებს.

როდიდან და რამდენი ლარით გაიზრდება პენსიები? _ ფინანსთა მინისტრის განცხადება

საქართველოს ფინანსთა მინისტრის, დიმიტრი ქუმსიშვილის ინფორმაციით, საქართველოში 2019-2020 წლებში პენსია 20-20 ლარით გაიზრდება.

როგორც პარლამენტის დღევანდელ პლენარულ სხდომაზე, 2018 წლის სახელმწიფო ბიუჯეტის პროექტის განხილვისას ქუმსიშვილმა განაცხადა, ძალიან მალე საქართველოს პარლამენტში საპენსიო რეფორმის თაობაზე კანონპროექტი შევა.

„შესაბამისად, ჩვენ გამიზნული გვაქვს, რომ აღნიშნულ პროექტში იქნება საბაზისო პენსიაზე ინდექსაციის ჩანაწერი, თუმცა სანამ ინდექზაციის ჩანაწერს განვიხილავთ, მანამდე გადაწყვეტილება მივიღეთ, რომ 2019 წელს და 2020 წელს ინდექზაციის მეთოდით პენსია გაიზრდება. 2019 წელს პენსია 20 ლარით გაიზრდება ისევე, როგორც  2020 წელს“ – დასძინა ქუმსიშვილმა.

“ლარის გაუფასურება დროებითია” _ ეროვნული ბანკი განცხადებას ავრცელებს

ეროვნული ბანკი სავალუტო ბაზარზე ბოლოდროინდელი მაღალი მერყეობის შესახებ განცხადებას ავრცელებს.

„როგორც არაერთხელ აღინიშნა, არსებული ინფორმაციის მიხედვით, კურსზე მოქმედი საშუალო და გრძელვადიანი ფაქტორები პოზიტიურია. მიმდინარე წელს სავალუტო შემოსავლები უმჯობესდება და ეს ტენდენცია მომავალ წელსაც გაგრძელდება. სექტემბრის მონაცემებით საქონლის ექსპორტისა და ტურიზმიდან მიღებული შემოსავლები წლის განმავლობაში თითქმის 30%-ით, ხოლო ფულადი გზავნილები 20%-ით გაიზარდა.

წლის განმავლობაში ბიუჯეტის ხარჯვა დაბალანსებულად მიმდინარეობს. ეროვნულ ბანკს მთავრობასთან აქვს ყოველდღიური კომუნიკაცია და დარჩენილ პერიოდშიც არ არის მოსალოდნელი კურსზე ბიუჯეტის ხარჯვითი ნაწილის მხრიდან რაიმე უარყოფით გავლენა. კიდევ ერთხელ ხაზს ვუსვამთ იმ გარემოებას, რომ მთავრობის მიმდინარე სახაზინო ოპერაციები ან ეროვნული ბანკის ლიკვიდობის მართვის რეგულარული ოპერაციები არ ახდენს გავლენას კურსის დინამიკაზე.

ბოლო პერიოდში ლარის კურსის ცვლილება ძირითადად შემოდგომაზე გაუფასურების მაღალმა მოლოდინმა გამოიწვია. მიუხედავად იმისა, რომ ამ მოლოდინს რეალური ფუნდამენტური საფუძვლები არ გააჩნია, მან მცურავი კურსის პირობებში მაინც მოახდინა გავლენა ლარის კურსის მოკლევადიან დინამიკაზე, გაზარდა რა უცხოური ვალუტის მოთხოვნა.

ზემოთქმულიდან გამომდინარე, ლარის აღნიშნული გაუფასურება დროებითია. თუ ეროვნული ბანკი დაინახავს, რომ გაცვლითი კურსის ცვლილებამ მომავალში შეიძლება შექმნას ზეწოლა ინფლაციაზე, თავისი მანდატის შესაბამისად, ეროვნული ბანკი გამოიყენებს მის ხელთ არსებულ ყველა ინსტრუმენტს მაღალი ინფლაციის თავიდან ასაცილებლად. ფასების სტაბილურობა, თავის მხრივ, უზრუნველყოფს კურსის გრძელვადიან სტაბილურობას.

კიდევ ერთხელ გვსურს აღვნიშნოთ, რომ საქართველოში მოქმედებს მცურავი გაცვლითი კურსის რეჟიმი, რაც აუცილებელია ეკონომიკის გრძელვადიანი სტაბილური ზრდისა და დასაქმებისთვის. მცურავი გაცვლითი კურსის პირობებში ბაზრისთვის დამახასიათებელია კურსის მოკლევადიანი ცვალებადობა, მათ შორის მოლოდინებზე რეაგირება, რაც სავალუტო ბაზრის ბუნებრივი ქცევაა. ჩვენი მიზანია მინიმალური ჩარევა საბაზრო პროცესებში, თუმცა ეროვნული ბანკი ფლობს ადეკვატური რაოდენობის უცხოური ვალუტის რეზერვს, რომელსაც, საჭიროების შემთხვევაში, გონივრულად მიმართავს“, – აღნიშნულია განცხადებაში.

 

ანაკლიის პორტის მშენებლობაზე ნებართვა გაიცა

„ანაკლიის განვითარების პორტის“ ცნობით, ეკონომიკის სამინისტროს ტექნიკური და სამშენებლო ზედამხედველობის სააგენტომ ანაკლიის საზღვაო ნავსადგურის მშენებლობის ნებართვა გასცა.

ამასთან, საქართველოს გარემოსა და ბუნებრივი რესურსების დაცვის სამინისტრომ „ანაკლიის განვითარების კონსორციუმის“ გარემოზე ზემოქმედების შეფასების დოკუმენტის საფუძველზე ეკოლოგიური ექსპერტიზის დადებითი დასკვნა გამოსცა.

“აღნიშნული სამინისტროებისგან ნებართვების დროული მიღება საშუალებას გვაძლევს ასევე დროულად და ოპერატიულად დავიწყოთ პორტის სამშენებლო სამუშაოები. ამ ყველაფერს წინ ხანგრძლივი მოსამზადებელი პერიოდი უძღოდა. ჩვენ უამრავი მნიშვნელოვანი დოკუმენტი მოვამზადეთ და თითოეული მათგანი მოცემულ ვადაში ჩავაბარეთ მთავრობას. ამჯერად ყველა საჭირო დოკუმენტი და ნებართვა არსებობს იმისთვის, რომ დავიწყოთ მშენებლობა და სამ წელიწადში ანაკლიის პორტში პირველი გემი მივიღოთ, “ – განაცხადა ანაკლიის განვითარების კონსორციუმის გენერალურმა დირექტორმა ლევან ახვლედიანმა.

ანაკლიის ღრმაწყლოვანი პორტის მშენებლობა 2017 წლის 20 დეკემბერს დაიწყება.

 

ფინანსთა სამინისტრო: საქართველოში თამბაქოს მოხმარება შემცირდა

2018 წლის ბიუჯეტის გადამუშავებულ პროექტში აღნიშნულია, რომ აქციზის განაკვეთების ცვლილების შედეგად, მიმდინარე წელს მნიშვნელოვნად შემცირდა თამბაქოს მოხმარება საქართველოში. 

კერძოდ, 2016 წლის იანვარ-აგვისტოში სულ რეალიზებული იყო 5,8 მილიარდი ღერი სიგარეტი, ხოლო 2017 წლის იანვარ-აგვისტოში სულ რეალიზებულია 4,9 მილიარდი ღერი სიგარეტი. თამბაქოს მოხმარება მიმდინარე წელს (8 თვის მონაცემებით) შემცირებულია 900 მილიონი ღერით, ანუ მოხმარება 15.5%-ით შემცირდა.

,,იმის გამო, რომ თამბაქოს მოხმარება 2017 წელს საპროგნოზო მაჩვენებლზე 8%-ით შემცირდება, ბიუჯეტში აქციზის გადასახადის სახით მობილიზებული თანხები ჩამორჩება 2017 წლის საპროგნოზო მაჩვენებელს’’, – აღნიშნულია პროექტში.

ბიუჯეტის შესრულების 9 თვის ანგარიშის მიხედვით, აქციზის გადასახადიდან შემოსავლების გეგმა 87,3%-ით შესრულდა და დაგეგმილ მაჩვენებელს (1,199 მლრდ ლარი) 152 მილიონი ლარი დააკლდა.

 

სხვადასხვა