საზოგადოება

,,ჩვენ ხარჯზე რატომ უნდა ავაცილოთ ევროპას ტრეფიკინგი და მიგრაცია, გულთგონთხართა?”

,,ის ანეკდოტი გამახსენდა, კურდღელს მგელი რომ ,,უპრაგონოდ” ხმარობს. ეს საწყალი ლომთან რომ უჩივლებს და ლომი რომ გრაფიკს დაუნიშნავს, მერე მგელი რომ გრაფიკს არ იცავს და კურდღელი რომ ბრაზდება – ეს ბუღალტერია რაღაზე ავიკიდეო.
#საქართველოსმთავრობა ეს ბუღალტერია რაღაზე აკიდეთ ამ ხალხს და ჩვენ ხარჯზე რატომ უნდა ავაცილოთ ევროპას ტრეფიკინგი და მიგრაცია, გულთგონთხართა? _ წერს ფეისბუქის საკუთარ გვერდზე უშიშროების ყოფილი მინისტრი – ვალერიან ხაბურძანია.

შეგახსენებთ, რომ საქართველოს პრემიერმინისტრმა – გიორგი კვირიკაშვილმა განაცხადა, რომ მოქალაქეებს, რომლებიც  ევროკავშირის წევრ ქვეყნებში 90 დღეზე მეტი ხნით დარჩებიან, საქართველო მოძებნის.

„დღეს, როდესაც ადამიანი მიდის ვიზით ევროკავშირის წევრ ქვეყანაში, მისი შემოსვლის თარიღის დაფიქსირება კონტროლის მიზნით არ ხორციელდება. ჩვენ დავაყენებთ სპეციალურ პროგრამას საბაჟო-გამსვლელ პუნქტებზე და როდესაც ადამიანი გაემგზავრება ევროპის მიმართულებით, უვიზო მიმოსვლის პროცედურებით გათვალისწინებული სამი თვის გასვლის შემდეგ, ჩაირთვება პროგრამის სპეციალური მექანიზმი და მოხდება იუსტიციისა და შს სამინისტროების ინფორმირება, რომ ესა თუ ის პიროვნება განსაზღვრულ ვადაში არ დაბრუნდა ქვეყანაში. ჩვენ ცირკულარით გავაგზავნით ევროკავშირის წევრ ქვეყნებში ამ ინფორმაციას და ჩვენი მხრიდან პროაქტიულად დავიწყებთ ამ ადამიანის მოძიებას იმისათვის, რომ მოხდეს რეადმისიის პროცედურის დაწყება. რა თქმა უნდა, ამ ხარჯებს სახელმწიფო დააფინანსებს, ხოლო შემდგომში თავად დამრღვევ პიროვნებას დაეკისრება ეს ხარჯი,“ – განაცხადა პრემიერმა.

გიორგი კვირიკაშვილის თქმით, საქართველოსთვის უმნიშვნელოვანესია სავიზო ლიბერალიზაციის გზაზე მიღწეული წარმატება, რასაც გაფრთხილება სჭირდება.

„მინდა, ჩვენმა ყველა მოქალაქემ იცოდეს, გამომდინარე იქიდან, რომ ჩვენთვის ძალიან მნიშვნელოვანია ეს მიღწევა, ასევე მნიშვნელოვანია, ვიყოთ პასუხისმგებლიანი პარტნიორი ევროკავშირის ქვეყნებთან. კიდევ ერთხელ განვმარტავ: 90 დღის გასვლის შემდეგ აინთება წითელი სიგნალი ჩვენს საბაჟო სისტემაში და დავიწყებთ ინფორმაციის გაგზავნას ევროკავშირის წევრ ყველა ქვეყანაში დამრღვევი პირების შესახებ. თვითონ ამ ქვეყნების შიდა პროცედურებით დაიწყება პიროვნებების მოძიება და მათი რეადმისიის პროცედურა. ასევე მნიშვნელოვანია, რომ ჩვენ მაქსიმალურად ვიმუშავებთ ევროკავშირის ქვეყნებთან, რათა საქართველომ მიიღოს უსაფრთხო ქვეყნის სტატუსი, რათა თავშესაფრის მოთხოვნა ძალიან ბანალური მიზეზებით იყოს ნაკლებად შესაძლებელი. იმ სამ თვეში, რა პერიოდიც გვაქვს, უვიზო მიმოსვლის ამოქმედების პირველი დღიდან, ჩვენ ამ პროცედურების შიდა სისტემურ მომზადებას დავასრულებთ და მინდა, რომ ყველა მოქალაქემ, რომელიც ევროკავშირის მიმართულებით უვიზოდ გაემგზავრება, წინასწარ იცოდეს ეს,“ – აღნიშნა პრემიერ-მინისტრმა.

წყარო: ნეტგაზეთი

Related Articles

Leave a Reply

Your email address will not be published. Required fields are marked *

Back to top button
Close