ერთ-ერთი „იუთუბ“-არხის მფლობელი, ჯაბა შავიშვილი, რომელსაც ექვსი წლის განმავლობაში ქართველი მუსიკოსების საინტერესო ნამუშევრები აქვს შემონახული, ირაკლი ჩარკვიანის მეუღლეს, ქეთათოს საჯაროდ მიმართავს, სოციალურ ქსელში და აქვეყნებს წერილს, სადაც სთხოვს, უკან გამოიწვიოს საჩივარი, რომელიც მის არხზე ირაკლი ჩარკვიანის ნამუშევრების განთავსების გამო გაუგზავნა „იუთუბს“. ამ საჩივრის გამო ჯაბა შავიშვილის არხს ამ პლატფორმაზე მთლიანად წაშლა ემუქრება. როგორც ჯაბა აღნიშნავს, დაიკარგება ყველა ის მასალა, რომელიც მან ექვსი წლის განმავლობაში ატვირთა… ჯაბა შავიშვილის მორიგების იმედი აქვს. ის წერს:

„!! ჩემი Youtube-ის არხი იშლება!!

საჯარო წერილი ქეთათო ჩარკვიანს.

ყველაფერი მაშინ დაიწყო, როდესაც 15 წლის ასაკში პირველად მოვუსმინე ჯგუფ „ტაქსის“ და ქიშო გლუნჩაძის მანამდე მიუწვდომელ ჩანაწერებს. ამ ყველაფერმა ისეთ გავლენა მოახდინა რომ, მას შემდეგ გადავწყვიტე ყველა მეგობარი თუ ნაცნობი, ინტერნეტში თუ ოფლაინში გადმომერთო ამ ტალღაზე.

2010 წლის შემდეგ, რაც პირველი Youtube-ის არხი წამიშალეს საავტორო უფლებების გამო (ძირითადად უცხოურ მუსიკას ვაქვეყნებდი) დავფიქრდი, რომ ქართული მუსიკა იყო ის, რასაც უფრო მეტი მზის შუქზე გამოტანა სჭირდებოდა და არა ვიწრო წრეებში ტრიალი.

2011 წლისთვის 19 წლის ასაკში დავიწყე ჩემს ხელში არსებული მასალის დამუშავება და Youtube-ზე განთავსება. მას შემდეგ 6 წელი გავიდა და დღეისთვის არსებულ 1100 (!) ქართულ ჩანაწერს, 8000 გამომწერი და 20 000 000 ნახვა აქვს.

რაც ძალიან მალე შეიძლება აღარ იყოს ხელმისაწვდომი.

მას შემდეგ რაც თქვენ Youtube-თან ირაკლი ჩარკვიანის სიმღერებზე საავტორო უფლებებზე მიჩივლეთ და ზედიზედ მომივიდა Strike 3 სიმღერაზე, Youtube მა 7 დღის შემდეგ ჩემი არხის მთლიანად წაშლა გადაწყვიტა.

– იშვიათად მომეპოვება ქართული მუსიკის ჩემნაირი გულშემატკივარი, შესაბამისად შესაძლებელი იყო ამ ყველაფრის შესახებ ჩემთვის პირადად მოწერა (მით უფრო, არც ისე მიუწვდომელი ვარ) რასაც ამას წლების განმავლობაში სხვადასხვა მუსიკოსი აკეთებდა.

– ჩემთვის არანაირი პრობლემა არ არის რომ რაზეც საავტორო უფლებები გაგაჩნიათ თქვენ დაგითმოთ.

– ამ არხზე ირაკლის სიმღერების გარდა 1000-ზე მეტი კომპოზიციაა ატვირთული ქართველი მუსიკოსების მიერ შექმნილი, რომელთაც პირიქით აუდიტორიაზე გასვლა ჭირდებათ და არა დამალვა და წაშლა.

– თუ ვინმე ფიქრობს, რომ ქართული კონტენტით რაიმე დიდი მატერიალური სარგებლის შოვნა შეუძლია, ეს შეუძლია, თვითონაც სცადოს – ქართული კონტენტის მონეტარიზაცია ყველამ იცის, რომ არ არის მომგებიანი მსგავს პლატფორმებზე.

– ამასთან ერთად წყალში იყრება ჩემი 6-წლიანი შრომა. სადაც თითქმის პედანტურად ვეცადე, ინფორმაცია მაქსიმალურად დამუშავებულად მიმეწოდებინა აუდიტორიისთვის.

ამ ყველაფრის გამოსასწორებლად კი ძალიან ცოტა დრო რჩება

თუ ოთხშაბათისთვის, თქვენ უკან არ წაიღებთ არსებულ საჩივარს, Youtube ჩემს არხს მთლიანად წაშლის და 1100-ზე მეტი ქართული კომპოზიცია (რომელთაგანაც შეიძლება ნაწილი მხოლოდ ჩემს კომპიუტერშია შემორჩენილი) ხელმიუწვდომელი იქნება ადამიანებისთვის.

ქართულ საზოგადოებას ინფორმაციული ალტერნატივა სჭირდება, მით უმეტეს ინტერნეტში, თორემ ნუ გვიკვირს, რატომ იზრდება ახალი თაობა რუსულ რეპზე.

იმედს ვიტოვებ, თქვენი გონივრული გადაწყვეტილების

ჯაბა შავიშვილი“

ჯაბას ამ პოსტის ქვეშ ნამდვილი დებატები გაჩაღდა, რომელშიც თავად ქეთათოც ჩაერთო და დაწერა:

„ყველა არხი, რომელიც ირაკლის და ჩემს მუსიკას ტვირთავს, მე მაზარალებს პირველ რიგში, ამდენი უნდა გესმოდეს ? მონეტიზაციის ფუნქციით ბევრმა იხეირა. საკმარისია…“. ქეთათო აღნიშნავს, რომ ჯაბა შავიშვილი არ ფლობს ირაკლი ჩარკვიანის სიმღერებზე საავტორო უფლებას, ხოლო ჯაბა შავიშვილის მხარდამჭერები აღნიშნავენ, რომ ბევრი ქართველი მუსიკოსი სწორედ ამ არხის საშუალებით გაიცნეს და შავიშვილი ირაკლი ჩარკვიანის აქტიურ პოპულარიზაციას ეწეოდა წლების განმავლობაში. ქეთათოს თქმით, ის აპირებს გააკეთოს ოფიციალური არხი „იუთუბზე“, სადაც ყველა ეს მასალა დაიდება – „ოფიციალურ არხზე, ან ჩემი თანხმობით, სხვა არხებზეც. ხაზგასმით აღვნიშნავ, არც ერთ არხზე, ჩემი თანხმობით არაფერი ატვირთულა. დღეიდან ყველაფერი აიტვირთება ირაკლი და ჩემს ოფიციალურ არხზე: MepeKetato Official. თუ ვინმეს ექნება სურვილი სხვა არხზე ჩვენი მუსიკის ატვირთვის, პირადად ჩემთან უნდა შეათანხმონ“.

მის ამ ნათქვამს ეპასუხება ლექსო მაჭავარიანი, რომელიც ასევე ტვირთავს „იუთუბზე“ ქართულ მუსიკას და ამ მხრივ საინტერესო არქივიც აქვს. ის ქეთათოს მიმართავს და წერს, რომ ირაკლი ჩარკვიანი მისით არ დაწყებულა – „შენით არ დაწყებულა ირაკლი ჩარკვიანი და არც დამთავრდება, სავარაუდოდ…“

წყარო:fortuna.ge

კომენტარები
Загрузка...

დატოვე პასუხი