თბილისში მცხოვრებ ამომრჩეველს არჩევანი ისევ და ისევ ცუდსა და უარესს შორის უწევს, რადგან კარგ არჩევანს პოლიტიკური ბაზარი ჯერჯერობით ვერ სთავაზობს, – ამის შესახებ „ინტერპრესნიუსს“ ექსპერტმა გია ხუხაშვილმა თბილისის მერობის კანდიდატების შესახებ დასმული კითხვის საპასუხოდ განუცხადა.

რაც შეეხება „ქართული ოცნების“ კანდიდატს კახა კალაძეს, გია ხუხაშვილის განცხადებით, „ქართულ ოცნებაში“ ლიდერები საერთოდ არ არიან და აბსოლუტურად არანაირი მნიშვნელობა არ ჰქონდა, თუ ვინ იქნებოდა „ქართული ოცნების“ კანდიდატი, რადგან ნებისმიერი მათგანი ზუსტად იმდენ ხმას აიღებს, რამდენსაც მოახერხებს ხელისუფლება თავისი რესურსით.

„ხელისუფლებასაც პირობითად ვამბობ, რადგან ეს ყველაფერი დღემდე ბიძინა ივანიშვილის რესურსებზე დგას და არა „ქართული ოცნების“ ელიტის რაიმე ტიპის ავტორიტეტზე, რადგან იქ ვერავინ განვითარდა და რეალურ ლიდერად ვერ ჩამოყალიბდა. ასე, რომ კალაძის ნაცვლად, სხვაც რომ ყოფილიყო, ისიც ზუსტად იმდენ ხმას აიღებდა, რამდენსაც კალაძე აიღებს“, – განაცხადა ხუხაშვილმა.

რაც შეეხება პროგნოზებს, ექსპერტის განცხადებით, იმ ფონზე, როდესაც ქვეყანაში პარტიული, პოლიტიკური ელიტის კრიზისია და ჯერჯერობით მხოლოდ პარტიული კანდიდატები ჩანს, სახელისუფლებო კანდიდატს, რა თქმა უნდა, უპირატესობა აქვს.

„ეს უპირატესობა განპირობებულია არა იმით, რომ ხელისუფლება ავტორიტეტიულია, არამედ იმით, რომ დანარჩენი პოლიტიკური ელიტა კიდევ უფრო უარესად გამოიყურება. ეს არის კლასიკური შემთხვევა, როდესაც თბილისში მცხოვრებ ამომრჩეველს არჩევანი ისევ და ისევ უწევს ცუდსა და უარესს შორის, რადგან კარგ არჩევანს, რისი მოთხოვნილებაც არის, პოლიტიკური ბაზარი თბილისს ჯერჯერობით ვერ სთავაზობს“, – განაცხადა ხუხაშვილმა.

გია ხუხაშვილი ვარაუდობს, რომ იმ კონფიგურაციის მიხედვით, რაც დღეის მდგომარებითაა, არჩევნების მეორე ტური იქნება.
„სავარუდო, მეორე ადგილზე გასული, დავუშვათ „ნაციონალური მოძრაობის“ კანდიდატი ზაალ უდუმაშვილი, ვერ მოახერხებს ოპოზიციური ელექტორატის კონსოლიდაციას იმ ძალიან მარტივი მიზეზის გამო, რომ მე-2, მე-3 ადგილზე გასულ პარტიებს დღეის მდგომარეობით უფრო მეტად ეზიზღებათ ერთმანეთი, ვიდრე ხელისუფლება. ისინი ერთმანეთში უფრო ხედავენ კონკურენტებს. აქედან გამომდინარე, მათი ამომრჩევლის შეკვრა-მობილიზება მეორე ტურისთვის იქნება შეუძლებელი, რაც პრინციპში ხელისუფლების პოზიციებს კიდევ უფრო გააძლიერებს. ეს არის ყველაზე მეტად სავარაუდო სცენარი. თუმცა იქედან გამომდინარე, რომ ხელისუფლებას აქვს ფანტასტიური თვითდაზიანების უნარი, რა ფორმით და როგორ გამოვლენს ამას თქმა გამიჭირდება“, – განაცხადა ხუხაშვილმა.

მისივე თქმით, კახა კალაძე გახდება თუ არა მერი, ამის მიუხედავად, მას თითონ წინასაარჩევნო პროცესი პოლიტიკურად ძალიან ძვირი დაუჯდება და საბოლოო ჯამში, მერობის შემთხვევაშიც კი მისი სამომავლო პოლიტიკური პერსპექტივა ფაქტობრივად, განულებული იქნება.

„კამპანია ნეგატიური იქნება. ამ პერიოდში კახა კალაძეზე ჩვენ შეიძლება ბევრი რამ გავიგოთ არცთუ სასიამოვნო – ტყუილი თუ მართალი, არ აქვს მნიშვნელობა. ეს ყველაფერი ერთად იქნება, მაგრამ ვფიქრობ, რომ მის მხარდამჭერებსაც კი ხშირ შემთხვევაში შეიძლება იმედგაცრუება დაეწყოთ. შესაბამისად, პოლიტიკური ფასი, რომელსაც ის გადაიხდის, იქნება ძალიან დიდი. მე ასეთ რამეს არც ერთ ადამიანს არ ვუსურვებ და არც კახა კალაძეს, რადგან მიუხედავად ჩემი პრეტენზიისა „ქართული ოცნების“ მიმართ, ის იყო ერთადერთი ადამიანი, რომელიც ცდილობდა, რომ საკუთარ თავზე ემუშავა, ანუ ოდნავ მაინც განვითარდა და პოლიტიკური კულტურის თვალსაზრისით წინ წაიწია, სხვებისგან განსხვავებით, რომლებიც პირიქით, მთელი ამ პერიოდის განმავლობაში დეგრადაციის გზას ადგანან და ამას წარმატებით აგრძელებენ“, – განაცხადა ხუხაშვილმა.

ipn.ge

დატოვეთ კომენტარი

კომენტარები

Загрузка...

დატოვე პასუხი